Yashyizweho kuri26 March, 2020 | 18:39

Covid-19: EAC yahuriye mu nama yiga ku cyibazo cya Coronavirus

Umuryango w’ibihugu bya Afurika y’iburasirazuba watangaje ko ejo kuwa gatatu abaminisitiri bashinzwe ubuzima n’abashinzwe ibireba uyu muryango mu bihugu biwugize, bakoze inama (video conference) kuri iki cyorezo.

Iyi nama niyo ya mbere itangajwe n’uyu muryango yahuje aba bategetsi kuri iki cyorezo cya Covid-19.

Itangazo ryasohowe n’uyu muryango, rivuga ko iyi nama yari igamije "guhana amakuru kuri Covid-19, gufatira hamwe ingamba, gushyiraho uburyo bwo gukumira ikwirakwira ryayo mu karere no guhangana n’ingaruka zayo".

Kugeza ubu, mu bihugu bitandatu bigize uyu muryango bibiri nibyo bitarabonekamo ubwandu bw’iyi virus; u Burundi na Sudani y’Epfo.

Mu myanzuro yafashwe n’aba ba minisitiri harimo;

Gusaba ibihugu bigize uyu muryango gukomeza gushyira mu kato k’iminsi 14 abaza muri aka karere.

Gusaba ibi bihugu gukomeza gusuzuma 100% abinjira n’abasohoka hakoreshejwe uburyo bugezweho bwifashisha imirasire mu kwirinda icyuho mu bagenzi bashobora kuyikwiza.

Bemeje ko urujya n’uruza rw’ibicuruzwa mu karere rukomeza ariko imodoka zibitwara zikagenzurwa ko zitarengeje abantu batatu, nabo bagasuzumwa kuko bari mu bafite ibyago byo kwandura no kwanduza.

Bavuze ko ibyo batwaye mbere yo kwambuka bizajya bibanza gukizwa ibishobora kubyanduza kandi ababitwaye bagashyirwa mu kato k’iminsi 14 bigendanye n’amabwiriza y’aho bagiye.

Mu rugendo rwabo, abatwara amakamyo basabwe guhagarara ahantu hagenwe gusa mu kwirinda ko habaho gukwirakwiza iyo ndwara.

Aba bategetsi bashyizeho uburyo bahuriyeho bwo kugenzura ibyo bumvikanyeho no guhanahana amakuru kuri iki cyorezo mu karere nk’uko itangazo ryabo ribivuga.

Kugeza uyu munsi nimugoroba mu bihugu bya Kenya, Rwanda, Tanzania na Uganda harabarwa abantu 99 bamaze kwandura iyi virus, imibare iri igenda yiyongera.

Denis Fabrice Nsengumuremyi /MUHABURA.RW


Tanga igitecyerezo

Ibitekerezo


Tanga igitekerezo


Izindi nkuru