Yashyizweho kuri24 March, 2020 | 16:01

Coronavirus: Mu gihe isi ikomerewe, Wuhan aho yahereye bari koroherwa

Abategetsi bo mu Bushinwa bavuga ko ingamba zari zisanzweho zo guhagarika ubuzima mu mujyi wa Wuhan aho icyorezo cya coronavirus cyatangiriye mu mwaka ushize, igice kimwe cyazo kizakurwaho ku itariki ya 8 y’ukwezi gutaha kwa kane.

Ingendo zari zarahagaritswe mu bindi bice by’intara ya Hubei, ari nayo irimo umujyi wa Wuhan, zirongera gusubukurwa guhera saa sita z’ijoro zo kuri uyu wa kabiri - ku baturage bafite ubuzima bwiza.

Umuntu umwe gusa mushya ni we watangajwe kuri uyu wa kabiri ko yanduye Covid-19 muri uyu mujyi, hari hashize hafi icyumweru nta muntu n’umwe uhatangazwa ko yayanduye.

Ibihugu bitandukanye ku isi biri guhagarika ubuzima busanzwe, ibindi nabyo bishyiraho amabwiriza abuza byinshi mu bikorwa bisanzwe byo mu buzima bwa buri munsi.

Hagati aho, impuguke mu buvuzi zivuga ko Abanyamerika bagomba kugabanya ibikorwa bibahuza, bitaba ibyo umubare w’abandura ukazarengera urwego rw’ubuzima muri icyo gihugu rugasigara rutagishoboye guhangana n’ubwo bwandu bushya.

Abasirikare bo muri Espanye bari gutanga ubufasha mu guhangana n’iki cyorezo, batahuye abarwayi bageze mu zabukuru aho babaga mu nzu yabagenewe, batereranywe, ndetse hamwe na hamwe, bapfiriye mu buriri bwabo, nkuko bitangazwa na minisiteri y’ingabo muri icyo gihugu.

Ishami ry’umuryango w’abibumbye ryita ku buzima (OMS/WHO) ryaburiye ko iki cyorezo kiri kongera umuvuduko.

Ubu abantu banduye bamaze kwegera 400,000. OMS iri gusaba ibihugu gushyiraho uburyo bwimbitse bwo gupima iyo virusi ndetse no gufata ingamba zihamye zo gutahura abagize aho bahurira n’abanduye.

I Wuhan bimeze gute?

Kuva hagati mu kwezi kwa mbere, umujyi wa Wuhan warafunzwe kuburyo nta muntu uwusohokamo.

Ariko ubu abategetsi bavuga ko buri muntu wese wahawe "uruhushya" binyuze kuri ’app’ y’ubuzima ikoreshwa cyane kuri telefone zigezweho (smartphones), azemererwa kuva muri uyu mujyi guhera ku itariki ya 8 y’ukwezi gutaha kwa kane.

Mbere yaho kuri uyu munsi, abategetsi batangaje ko hari umuntu umwe mushya wanduye coronavirus, bisoza iminsi itanu yari ishize nta wundi muntu mushya wanduye iyo virusi muri uwo mujyi.

Imibare ya leta y’Ubushinwa ivuga ko mu Bushinwa hose abantu 78 bashya ari bo banduye iyo ndwara mu masaha 24 ashize.

Uretse bane gusa banduye bitewe n’abagenzi bageze mu gihugu, abandi bose bavuye mu mahanga.

Iki kiri kwitwa "icyiciro cya kabiri" cy’ubwandu buzanano kiri no kugira ingaruka ku bihugu nka Koreya y’epfo na Singapour, ubundi byari byarashoboye guhagarika ikwirakwira ry’ubwandu mu byumweru bicye bishize.

Umubare w’abandura bashya buri munsi ukomeje kugabanuka muri Koreya y’epfo.

Kuri uyu wa kabiri, yatangaje umubare wayo uri hasi cyane w’abanduye ku munsi wa mbere guhera ku itariki ya 29 y’ukwezi gushize kwa kabiri.

Niyomugabo Albert/MUHABURA.RW


Tanga igitecyerezo

Ibitekerezo


Tanga igitekerezo


Izindi nkuru